2Cor 4 | ATA | STEP | Anu aloxo ne la sou loxo no anu alauna noxou Lataua la Anu mulosixe xaixai ane 'o. La sou nexi ta'olevalele uasi.

a 4:22Ko 2:17; 1Te 2:5

b 4:4Ep 2:2; Kol 1:15; Eva 1:3

c 4:6Tav 1:3; Ais 9:2; 2Ko 3:18

d 4:72Ko 5:1

e 4:82Ko 1:8, 7:5

f 4:101Ko 15:31

g 4:11Rom 8:36

h 4:13Lex 116:10

i 4:141Ko 6:14

j 4:16Ep 3:16

k 4:17Rom 8:17-18

l 4:18Kol 1:16

2 Corinthians 4

Mimii Lailaixe Musuku Uxolu no Anu Vexavexasou no 'a Lialia 'o

1 Anu aloxo ne la sou loxo no anu alauna noxou Lataua la Anu mulosixe xaixai ane 'o. La sou nexi ta'olevalele uasi. 2 ^aMo nexi taxexeenu 'ili'ilixo ane tavuna mo ane tamaela no anu ne. Nexi ta'oxonu 'ilixo sou kalakalavoi uasi mo tapolo vile vaikala noxou Lataua uasi. Anu aloxo ne uasi. Ia nexi taa'aloxu vaikala manina ne ulamanasi. Aloxo ne ta mitema itoxonexi mo ta mitema xavutalai'a ulamana la sou ulai no anu xavutala laixe ne mumaxai'xe lamana noxi'a ta mitema ukalusi ne no iou Lataua. 3 Mo lexe a'alo laixe noxou Iesu Kalisito ane nexi tea'aloxu ne pupuni mutaluxu, la pupuni mutaluxu ne noxi'a ane'i ane sou isoisoli. 4 ^bXo anu Satani lataua sou lialia 'o ne mutatusou xavutalai'a ta mitema ane imulaxu tane'i noxou Kalisito uasi ne mo sou mamu sou ane'i imaisou lamana no anu a'alo laixe sou lamanaxu Kalisito e Anu sosovo maninasou noxou Lataua nesi. 5 Xo nexi talaa vaikalasixe la uasi, ia Iesu Kalisito ne, lexe anu Tila, mo nexi mexe la ne aloxo ta mitema sou xaixai noxou sou Iesu nesi. 6 ^cXo Lataua anu e muvikala lexe, “Lamana uiei molu no nano no 'a isivoxo uuatu,” ne mu'oxonu lamanaxu muiei no nano no tanexi sou ulosinge lamana sou talavusou laixe sou lamanaxu Lataua no 'a alaiou Kalisito ne.

7 ^dIa nexi teno'u mii ane laixe musuku ne aloxo no anu vexavexasou no lialia 'o sou tamaxa'u lexe xavi toxotoxoxa'a ukalusi ne anu molu noxou Latauasi ia nexi mexe takoiinu uasi. 8 ^eNexi ne texamuli tu'utu'umaxu muxaliliexi mukalusi, ia umamulonexi uasi, mo tanexi lili ia tanexi utaloxo uasi. 9 Mo i'oxo masuanexi ia nexisisi taxolu uasi, xe ipuasixe ia ikalusixe uasi. 10 ^fUtotomu ne nexi taxixaolixu solixu Iesu no anu vasimexe mo sou mauli noxou Iesu ne umomomo sou upala'a no anu vasimexe kalumo. 11 ^gXo nexi e tamauli ne ane tatavulenu soli sou Iesu mo sou maulixu umomomo sou upala'a no anu vasimexe e sou soli 'o. 12 Aloxo ne la sou soli anu a uxaxai no nano noxixe, ia mauli anu a uxaxai no nano noxinge ta Kolinito.

13 ^hAloxo kaukavu muai no nano no anu Lavuku Tavuna teinu muvikala aloxo 'o, “Eni emulaxu taleli, aloxo ne la sou eni evikala ne.” No anu Uleenu ane nesi sou mulamulaxu tanenge ne la sou nenge kalumo tamulaxu tanenge mo sou tavikala aloxo ne. 14 ⁱAnu aloxo ne xo nenge telavu lexe Anu ane mutulusou Tila Iesu no anu soli ne utulusixe kalumo nenge'a Iesu mo upitanenge nenge'a sou upamotoninenge no talaxu. 15 Mimii ukalusi ane 'o ne sou umomomosinge, mo sou alauna ane u'ana'analinenge ta mitema tavu'avu'alo ne umomomo sou uuavutinoxu vaikala 'osa laixe sou ane'i iiti Lataua no 'a lamanaxu musuku ne.

16 ^jAnu aloxo ne la sou nexi ta'olevalele uasi. Manina loxo vasimexe no ale anu a sou usoli ne ia tanexi no nano ne uxaxali alavua no voxovoxo utotomu. 17 ^kXo tu'utu'umaxu noxixe ne uxolu maxuveeni uasi, uxolu voxo ataxusi. Ia Lataua ukolinexi no 'a lamana ane uxolavu ane muuaulixu tu'utu'umaxu mukalusi ne mu'oki manina mo ukalu uasi. 18 ^lLa sou nexi tautitisou mii ma'ia ane no texa 'o uasi ia mii ma'ia ane no anu. Xo mii ma'ia ane no texa ne anu ulai la ukalu, ia mii ma'ia ane no anu ne anu tamaisou uasi ne. Anu uxolu utotomu mo ukalu uasi.